Գինու թանգարան, որտեղ գինեգործությունը ներկայացվում է որպես արվեստ

Իսպանիայի Ռիոխա շրջանում գտնվում է Vivanco Museum of Wine Culture-ը՝ գինու մշակույթին նվիրված յուրահատուկ թանգարանը։ Այն տեղակայված է Բրիոնես քաղաքում՝ Իսպանիայի ամենահայտնի գինեգործական տարածաշրջաններից մեկի սրտում։

Սա պարզապես գինու շշերի և խցանների մասին թանգարան չէ։ Այստեղ գինին ներկայացվում է որպես մարդկային մշակույթի անբաժանելի մաս՝ հնագիտության, գեղանկարչության, քանդակագործության, հին գինեգործական գործիքների, գինեգործության պատմության և նույնիսկ խաղողի տարբեր տեսակների հավաքածուի միջոցով։

Թանգարանի տարածքը կազմում է շուրջ 4,000 քառակուսի մետր։ Ներսում այցելուները կարող են տեսնել, թե ինչպես է տարբեր ժամանակաշրջաններում փոխվել մարդկանց վերաբերմունքը գինու նկատմամբ, իսկ դրսում գտնվում է Բաքոսի այգին, որտեղ աճեցվում են խաղողի տեսակներ աշխարհի տարբեր գինեգործական տարածաշրջաններից։